Lugano
Schafe und Geissen unterwegs
Hüt hets üüs mengs moll schier abem Velo ghaue – so het da gstürmt. Oder mir sind au im MTB-Modus grad no knapp fürsi cho. Am Aafang, über Figino bis Morcote isch natürli umgkehrt gsi – doo simmer meischtens Off und ohni Trätte gfahre. A propos Trätte: Zehrsch simmer bem Velohändler verbii. De hätt d’Schruube vo mine Trätthebel mit sicher 3 Umdräinge aazoge – mir hend üüsne Auge nid traut. Debii sind d’Velo im Service gsi! De Joos isch vermuetlich eifach z’grooss zom no en seriööse Service chöne z’mache.
Und denn vo Morcote bis Lugano isch es jo meh oder weniger flach – aber mir sind au im MTB Modus mengs Moll schier sto bblibe.
Vo Lugano simmer denn a de Cassarate nooh en wunderbare Weg entlang gfahre, bis dases nümme ggange isch – und denn würkli steil ue uf Sureggio. Und denn simmer chrüüz und quähr über Tesserete, Origlio, Comano (döt söttme wohne!) wieder haam gfahre – und zehrsch is Auto ieghocket und d’Windstilli ggnosse. Und denn hend grad no d’Berliner aagglüüte – und denn simmer füre go z’Nachtesse (Risotto).
