Mir sind früeh ufgstande und am 8-i losgfahre, well mr no bem Loris verbii gönd, bis mr z’Mittag mindeschtens bis uf Lugano-Muzzano fahred – öb Gotthard oder San Bernardino chunnt no uus.
Mir sind tatsächlich, noch gfüehlt mindeschtens 30 Johr, wieder moll dur de Gotthard gfahre, hend offesichtlich riese Glück gha und scho am halbi 3 im alltägliche Stau vor Agno gglandet – und churz noch de drüüne uf em Velo ghocket. Und jo: De Campingplatz, au die zwee nebed draa, isch voll, belegt.
Z’Obed simmer is Camping-Restaurant go Risotto Porcini esse. Und nochher hemmer no d’Wohning und d’Flüg bbuechet, und grad nomoll Glück gha: im Flüüger uf Berlin hets grad no zwee Plätz gha!