Hüt simmer über de Ceneri noch Bellinzona gfahre, womer vill spööter als beabsichtigt z’Mittag ggässe hend. Underwägs hani benere Teerufbereitings-Aalage a üüsi vier Buebe tenkt.
Chasch direkt i de Camera App de Film ufs gwünschti Format zueschniide – chasch aber au ersch be streamable mache. Streamable zaaget jedes Bildformat ohni schwarze Balke aa. Wennt en wotsch inere Websiite prozentual skaliert iibette, moschen uf 100% looh und inen prozentual skalierte div container iischriibe. Und wennt etz da nid verstande häsch, fröögsch mi unscheniert. I dere Viertelstund Bahnfahrt hani grad de Bricht gschribe, inkl. konfektioniere vo Film und Fotene.
D’Abfahrt uf Cadenazzo abe goht de normale Passstrooss entlang. Isch nid luschtig, loht sich aber nid umgoh. Zom Glück gohts nu e Viertelstund.
Z’Bellinzona isch e Manifestazione gsii: roti Fahne vo de unia und orangigi vo de CVP(?) bunt durenand. En Saulärme, mr hend aber nid gwüsst, om wa das goht.
Kunscht am Bau (uf de Piazza del Sole) isch aber scho schöner:
Mr sind denn uf Giubiasco zrugg mit em Velo und vo döt uf de Ceneri ue bis Mezzovico – wellme in Giubiasco eh mo umstiige. Vo Mezzovico simmer denn wieder mit em Velo haam gfahre. Di erscht Helfti vo dem Weg isch würkli schöö gmacht, die zweit teilt me sich halt mit Zuebringerverchehr. Isch aber nid schlimm.