Hüt simmer zersch uf Grancia is eigentlich Iichaufs-Zentrum vom Sotti Ceneri gfahre, wel i ha wele en 25-er Torx-Schruubezier chaufe. Nu wele. Vill z’tüür.
Denn simmer über Figino noch Morcote, Melide und über de Damm uf Bissone gfahre, womer amene würkli lauschige Plätzli direkt am See z’Mittag ggässe hend.
In Maroggia simmer links abboge und ufem chürzischte* Weg uf Arogno ue (600 MüM) gfahre. *Es git natürli kan andere, vorallem kan flachere. Es goht scho cheibe steil berguf – ohni Strom chämemer nie und nimmer uf d´Idee, do ue z´fahre. Es lohnt sich aber grad drüüfach: 1. isch do obe absoluti Rueh, zweitens isch d´Abfahrt scho no kuhl und 3. de Uusblick fantastisch – vorallem uf de Monte Migros.
