Hüt isch würkli en bsundrige Tag gsi. In Eschenz simmer duruf und um de Schöneberg ume – und denn über Chlingezell bis fascht wieder uf Mammere abe. Döt simmer zersch emoll d`Strooss Richting Liebefels duruf, aber zimli schnell linggs ab und denn ufeme Wanderwegli mit schönschte Uusichte zo de Neuburg. Döt hemmer zwei bsunders Liebi aatroffe und en chliine Schwatz gmacht über die Burg und we schöö das es isch und über de Chriegsverbrecher, wo het chöne als Staatsmaa i d`Gschicht ii goh, wener zersch do here cho wär und denn d`Ukrainer gfrööget het, öbs weled fortan zo Russlang ghööre.
Vo de Neuburg bis übers nööchscht Tobel uus (vo dene häts doo aas nochem andere), simmer ganz uf de Seerugge ue und über Hagebuech und Tägermoos (läck isch da schöö ggläge!) uf Steckbore abe. Döt hemmer gmerkt, das es scho Viertel ab 5-i isch und ich ha schnell de Ruth gschribe, womer sind und üüs für üüseri Absenz entschuldiget. Denn hemmer diskutiert, öb mr söled zrugg oder wiiter bis uf Konstanz fahre. Wegem bevorstehende z`Nacht im Boccone hemmer üüs für wiiter entschiede. Womer nochem z`Nacht am Bahnhof aachoo sind, es isch grad öppe halbi 8-i gsi, hät üüs en junge Maa gsaat, z`Züg Richting Singe fahrid nid, d`Strecki sei gschperrt, well an vor en Zug ggumped sei. Nocheme chlinere Gschtürm hemmer da Choas verlooh und sind mit em Velo bis uf Radolfzell gfahre. Z`Petershausen häts denn en Huuffe Polizei- und Füürwehr- und nomeh Auto und natürli au no Gaffer ghaa. Z`Radolfzell isch tatsächlich en Zug choo. Mir sind denn nid elaage gsi im Zug inne – mit de Velo! Und de Velotäsche draa! In Singe hemmer denn grad nomoll de Zug gnooh bis uf Bietinge.
Am halbi 9-i und noch 81km simmer zersch under d`Tuschi.
Audioaufnahmen mache ich mit der Mobile App Mp3Recorder und lade sie von dort mittels FTP direkt auf den Server – that`s IT!