Geschter hani no gsaat, mir mösid bis Gordola fahre, zom is Verzascatal iechoo. Z’Tenero simmer bem Bahnhof dur d’Underführing – und halbe z’Mergoscia obe (liecht übertribe) hani gmerkt, damer z’früeh weg sind. Also alles wieder abe und damoll würkli bis uf Gordola und denn zäch duruf bis zur Staumuur. Es het erstuunlich wenig Wasser im See. Entweder hends für guets Geld Strom uf Tüütschland verchauft, oder es isch würkli troche. Mir sind denn bis uf Lavertezzo zo de berüehmte Brugg und de no berüehmtere riesige Steibölle i de Verzasca hindere gfahre, hend döt ufem Spielplatz mit beschter Uusicht z’Mittag ggässe und sind denn wieder zrugg und uf Gorippo ue gfahre. Ich bi churz is Dorf – alleg zom mir bestätige, da Gorippo z’Tod saniert worde n’isch. Es isch eifach ka Lebe drin. Nid well ussertere Uusstiigeri us de 80-er-Johr niemert ume gsi isch. Es Dorf selber würkt wene Museum usem letschte Johrhundert. Jo nu. Mir sind denn abe und uf Locarno gone Glace esse, und denn grad no uf Ascona gode Summer gnüüsse – hüt isch würkli heiss gsi. 50 km
