Chuum simmer richtig losgfahre gsi, also no vor Herblinge, isches sowiit gsi. Sid em letschte September (abzüglich Herbstferie und Berlin) hemmer 3000 km gmacht. «Zweimoll Berlin-Rom. Scho krass, wot du hetsch chönne lande, wennt zwüscheddure nid immer haam wärsch 😂😜 (Kommentar vo de Lisa).
Hinne im Mülital simmer s´Rändli duruf und über de Guetbuck und s´Zegli is Siblinger Randehuus (haasst neuerdings Randenhof) gfahre go z´Zmittag esse. Nänäi, nid im Reschtorand, ufeme sunnige, windgschützte Bänkli zu de Velotäsche uus. Und denn simmer ebe zom Auer uf Hallau go 3 Räbli chaufe – und gege d´Bise s´Chläggi duruf und übers Färberwisli, de Hohlebaum und Schloss Herblinge wieder haam gfahre.
