Mir sind am Morge n’am 8-i mit de Velo uf de Zug uf Altstette, hend a de Saumacker Bröötli und Windle vor Türe glaat und sind mit em Velo is Bebek i de Kalkbreite gfahre. Döt simmer, zeme mit s’Matice zom Geburtswuche-Brunch iiglade gsi. S’Wetter isch jo absolut grandios gsi, mir sind be früehsummerliche Temperature verrusse im Garte gsi.
Und am 12-i simmer losgfahre und noch 6 Stund und 89km wieder dihaam gsi. D’Tour isch grandios gsi: mir sind z’Regesberg obe, z’Bülach und i de Tössegg gsi. Und e chli detailierter simmer über d’Hardbrugg uf Höngg und Affoltere, rechts a de Chatzesee verbii, über Watt, Nassewil, de Schwänkelberg und Burghof uf Regesberg ue, nochere Besichtigung über Steimur, Neeri und Schache uf Eglisau und vo döt über Tössegg, Berg am Irchel, Flaach, Ellike am Rhy und Rhynau haam gfahre. We gsaat, 89 super-schöni km.