Mir sind zom Campingplatz uus rechts und denn immer grad uus in Parco Naturale San Rossore gfahre. Dure grossi Allee simmer denn uf di riesig Aalag Cascine Nuove gstoosse. Denn simmer immer Richting Meer, verbii amene verlassene und verwunschene Landwirtschafts-Ghöft, gfahre – bis damer vomene Militär i Zivil fründlich empfange und ebeso fründlich druf hii gwise worde sind, dases do nümme wiiter göng: militärisches Sperrgebiet. E Hiiwiistafele hemmer aber nid gsäh.
Hüt hätter 18 Grad gha – gege n’Obed isches aber gfüehlt nid meh als 13 gsi. Morn sötts grad umgekehrt sii: 21, gfüehlt aber 23. Moll luege.