Glück im Unglück
Obwohls recht chalt gsi isch, simmer hüt, im Gegesatz zo geschter, nid ggloffe, sondern zom Jumbo gfahre. Döt han i d’Reservation vo Liimholzplatte retour gmacht. Und well mer grad be Platte sind: won i wieder usse cho bi, hät d’A mit em Schorsch Zanelli gschwätzt – und ich schnell gmerkt, dan i en Platte ha. Natürli hinne. So vill zom Pech. Zom Glück hät de Jumbo erschtens en grosszügige Iigang (wo me cha a de Wärmi s’Velo flicke) und zweitens e Velo-Abteiling. Und so han i nid bloos chöne en neue Schluuch chaufe, sondern nochem Ufzieh grad au no chöne pumpe. So sötts eigentlich immer sii – wenn scho, denn scho.