Üüsi hütig 70km Tour isch zimli lang meh oder weniger e Flachetappe gsi. Mir sind über Diessehofe, Schlattingen, a de Stammerbadi, am Nussbommer- und de Hasesee entlang uf Uerschhuuse, Buech be Frauefeld, Hinderhorbe, Nergete und Weckinge (da isch im Fall, wo d´Füchs und d´Häse nand guet Nacht säged!) gfahre, womer uf em Waldkauzplatz (e Liechting im Wald) z´Mittag ggässe hend. Denn simmer zersch am idyllische, sich dur de üsserscht Rand vom Waffeplatz Frauefeld schlängelnde Seebach entlang und denn uf Herdere und wiiter uf de Seerugge uegfahre. Z´Herdere hemmer en churze Bsuech vorem Schloss gmacht und miteme Maa, wo döt wont und schafft, gschprööchlet. Vo Herdere duruf chunnt me in Hörnliwald, denn uf Moorwile und denn, genau nördlich uf d´Hoochwacht, en unglaubliche Uussichtspunkt miteme Überbliipsel us em Chrieg. Über Chlingezell und Freudefels simmer uf Stei am Rhy abe go ne Glace esse und mit de Berliner Buebe go video-gschprööchle. Übermüetig, wemer sind, isches denn gliich no e richtigi Mehrfach-Bergetappe worde. Zersch uf de Wolkestei ue, uf Hemishofe abe und grad no uf de Chroobach ue. Zimli schlechti Stroosse doo, mos moll im Ramser Gmaandspresi säge.
Click/touch ins Bild, um einen kleinen Film sehen zu können.
Diashow
