Mir sind halt vill z´spoot abgfahre und drum vor de 12-e irgendwo vor Moos es erscht Moll vomene Gwitter überrascht worde, hend aber Glück gha, well grad e Hütte i de Nööchi gsi isch. Mir sind di erschte gsi, wiiteri sind choo. Di Ungeduldigste sind natürli z´früeh wieder ggange und grad nomoll nass worde. Mir hend möge gwaarte und sind erscht abgfahre, wos wieder gschohnet het. Mir hends denn bis zom nööchschte Gwitter bis uf Radolfzell i d´Musikkupple am See gschafft. Döt hemmer z´Mittag ggässe. z´Allensbach, nochem 3. Gwitter, hemmers denn ufggeh und sind uf de Zug zrugg uf Singe – und vo dött über Hilzinge und Riedheim wieder mit em Velo haamgfahre. Es sind trotzdem schöni, knappi 50 Kilometer gsi.